wy的經驗(060325)

www.out-of-body-guide.com

  今朝早比個電話嘈醒左,跟住再訓返,我既出體經驗幾乎每次都係醒左之後再訓返先得既,當時無幾耐之後訓著左,開始發夢喇,唔記得左響咩情況下知道自己發夢,我剩係記得我知道自己發清明夢果時係係一條鄉村咁既地方,我知道自己係發緊夢既時候,第一件事當然係記得試試出體,但第二件事就咁樣諗喇,好日都唔發下清明夢,咁難得,等我響夢入面扮演下「神」既角式,玩夠先出體啦,(因為當時我知自己可以隨意創造夢境),後黎我首先選擇左後者……

  響夢入面玩夠之後,我就響夢入面叫自己出體,我不斷地想著我要出體,我要出體,突然,周圍既景物突然間黑晒,而我熟悉的耳邊雜音,高速向後倒退的感覺又出現了,但呢次同往時經驗唔同既係,當我再次睇到周圍景物時,竟然重係果個我發清明夢時既果個場景,我當時就感到其怪喇:「咦?點解重係呢度黎既?以前既體經驗成功出體後係首先會見到自己屋企先架?」

  我以為自己出體唔成功,於是第二次嘗試叫自己出體,呢次我嘗試去想:」我要向上昇起,我要向上昇起!」,同上一次一樣,周圍景物變黑,耳邊響起雜音,高速倒退……但當我再睇返野既時候,竟然重係我第一次發清明夢既地方……

  真係好奇怪,重係唔得,當時我重諗到醒左之後要響呢度貼文問下點解先得……試左兩次唔得,跟住再試左兩次,仍然都係唔得,經過雜音,離心力後,仍然係清明夢入面既場景,試多兩次之後我開始驚,死啦,點解會咁既,唔通我已經出左體?如果係咁既話呢度邊度黎架?我會唔會返唔到去架?於是我諗起呢個網站所講,大力眨眼,眨左兩下之後就醒左了!

  我想問問點解會咁既?前幾次既出體經驗出體後都首先會見到自己屋企架,但今次出體後係一個陌生既地方?