Ray Wong的經驗(060322)
今朝發緊夢(個夢既內容已經唔記得)，唔知點解去到某個point個意識醒了，知道呢個係夢境，當時我響一座好古舊既大廈梯間，但一切有一種朦朧感(同清明夢既感覺差好遠)，跟住我叫自己「出黎」，然後便感到出體震盪，接著又係高速向上飛，週圍便得好光，主要係淡藍光及白光，在飛緊期間，問自己想去邊度，結果決定了要去探一個好掛住既人。
鏡頭一轉，我已經企響某一個住宅單位內，在我前面有一個人的背影，我認得係佢。唔知點解週圍景像都係有一點朦朧，唔似我以前出體果種清淅感，但我的意識好清醒。我見到佢好似有點發福，我行前搭佢膊頭叫佢，佢擰轉身望我，我眼前既佢老左好多……
我問佢：「你認唔認得我？」
佢回答：「唔認得。」
「我係邊個邊個呀！」
「無印象。」
「唔緊要啦，我係黎探你既。」
佢面露微笑。我感覺到佢好似唔係好清醒，有一種迷糊。
跟住我留意到身後有兩個小朋友週圍走好活潑，佢望住果兩個小朋友面露一種好慈祥的笑容。
我問佢：「係咪你既孫？」
佢回答：「係呀。」
「你今年幾多歲喇？」
「都六十幾喇。」
跟住我都諗唔到仲有甚麼可以同佢講，因為佢都唔認得我。我同佢講，我係時候走喇，佢望一望我又無乜反應，跟住我合上眼，意識上要返去，跟住我一掙開眼便回到床上了。
今次個經驗好特別，因為明明係出左體，有出體過程，但點解個境物會有一種朦朧呢？其實我係咪去左佢既夢境到探佢？抑或係所有野都係我自己投射出來的景物？我唔識分。