asdfoiewr的經驗(050907)
尋晚三點半醒左，去完廁所，發覺個時間差不多訓左三小時，可以出體，跟住觀察入睡出體，好耐無試過半夜出體喇，呢排多數朝早懶人出體法。
入睡不久，清醒，返回肉身，今次係用頭做重心轉出來，係順利。一出來，都係天黑，好似現實咁，響房度，我行出廳，很驚奇，因為係第一次屋內間隔同現實一樣，廁所，廚房等都冇走位，傢俱都冇多冇少。
見到原位既日曆，真係好開心，因為每樣野都咁原裝，睇下日曆上o的memo，睇到既話就可以證實到喇，一看之下差不多見到，一用力o的字又變，又失敗左，我尋找證物一輪，都係失望而回。
不久，我見到我老婆從房中走出來，我即刻同佢講：「唔使驚呀！我係咪半透明架？你係咪見到我呀？我出緊體呀。」佢望住我，明顯係見到我，但係冇驚既表情，冇乜反應，應該係夢體。
心諗，應該唔會係肉體既佢，因現實中我見佢三點多已去過廁所。跟住我同佢示範，出體係可以自由咁飛既，我飛出窗，又飛返入屋，佢一o的都無驚奇，都係木冇表情，跟住同佢講：「拿！我要回體啦，你望住我啦，我會響度消失架……」