a的經驗(050810)
醒左，返訓。
突然感覺到有出體訊號，頭有小小暈(浮)，仲感到靈魂同肉身處於可分離狀態，感覺就好似一個裝左水既樽，水可以隨時流出。
當時我肉身係扒響床上，眼前仍是漆黑一片，輕輕向後一揪，順利離體。
第一次扒係度出體，以往都一定要打平向上訓先會成功。見到房內擺設正常。環顧四周都無其他人，我期望有守護靈或阿爺係度等我，
我好失望。
因為房有o的暗，我走到窗邊打開窗簾，打開窗，大白天，我大概係10幾樓向下望(實際上我住2樓)，樓下有好多香港紅色的士。
仲聽到有阿伯唱緊一o的好「廟街」既歌，但見唔到任何人。
我回頭房內，都仲係無人，我就響房內徘徊，一路等守護靈同我阿爺出現，希望佢地是但一個會出黎。同時發現我放響床頭櫃上既小字條唔見左。
再返到去窗邊向外望，再一次希望守護靈係外面等我。可惜都係無人。
呢次景色唔同左，落緊雨，外面有o的暗，不過遠處既灰黑雲下，有好多大扇型彩虹，不過彩虹同平常見既唔同，幾壯觀。樓下近處，地上有冰雪，有好多好似小朋友，著住同一款全黑色厚褸，響地上挖洞，每個洞直徑一個人咁長。
佢地好似係玩，又好似係工作緊。本來我把心一橫，想飛出窗。但突然感到自己有重量，飛唔起，亦唔想勉強跳樓，就放棄左。
再回頭床上，發現一個人，起初以為係我阿爺，行近望真o的，原來係我一個同事，我叫佢走，我話我而家唔得閒。佢就出門口，但門外出現另一個女同事，比左封信我，再過一陣，眼前一黑就醒左。