asdfoiewr的經驗(050708)
今朝五點半起左身，個天已經光光地，我去過廁所，跟住再訓，冇訊號，我試下郁個soul啦，對腳順利出體，但上半身唔得，一不小心，郁左肉體，又由頭黎過，我大聲叫浮起，掂！成個人比張被包住咁浮起左，我捐番出黎，跟住跌左落地，出左體。
一出來，影像很清，我好快咁走出廳，今次我決定每隔一陣就睇手同埋叫自己清醒，我入到一間房，開左燈既，我用手諗住熄燈，不過熄唔到，我入另一間，見到我老豆訓左響床，諗住想跳啦，不過有窗花，咁我又走返入自己間房，無窗花既，望出去明顯唔係現實，藍天，有海，似尖沙咀，我跳出去，爽呀！
就到地果陣我轉做低飛，我一路飛，見到ok便利店，xx商業銀行，很多商店當時都很理所當然的認為自己身處尖沙咀。
我一路飛，到新世界中心，入左去，入面空間好大，其實同現實唔同，我參觀哂成個商場，跟住飛出去，見到街上行人很少，心想尖沙咀冇理由咁少人架，我轉入彌敦道(轉為行路)，向旺角方向前進，去到一個地下商場，有間玩具反斗城，理所當然的認為有條通道可在地底通往旺角，但搵唔到去路，有個職員同我講：「而家咁夜條路封左喇。」
咁我行返出彌敦道，繼續向旺角方向行，點知行行下，條路好窄，又轉彎，又上斜，心諗無理由架，條路應該係直個喎，轉轉下，點知又去返新世界中心。
於是我飛去高空望番落黎，原來係一個好大既島黎，仲見到海運果邊，我向果邊飛，響原本香港酒店對出成個長碼頭個位係一個好大既機動遊樂場，有過山車，同一o的現實無既機動遊戲，我飛到一個類似過山車既機動附近，有班人響上面玩緊，佢地叫我一齊玩，由於玩既方法要不停用手，搞到我呢段時間冇睇到手，可能刺激關係，能量用得快，有回體訊號了，我急忙拎返對手出黎望下，不過眼前已經黑哂，望唔到，跟手回埋體。