小葵籽的經驗(050626)
返九點工咁早，好難出體架啦。
我既出體兩個可能性：極度疲累或第朝賴床。前者出到都非常無聊，所以無再記低……都係後者比較好，意識清楚o的，energy多o的……個天光o的……
今朝出左兩次左右。第一次好短，第二次較長。不過好幾次陷返落夢，好彩家陣記得睇手。開始覺得唔妥，就好認真咁睇一次自己對手。然後就會記得自己係出緊體(其實一路都記得，但有o的狀態係夢裡以為自己出完體，返左現實……)。
第一回：純粹自己出左去。-__-無乜目的……臨落街前已經要睇手，跌到落街前醒左……
第二回：知道自己開始會連出，咁就諗定去邊，想睇前世……不過唔多順利，因為我經出一出就係o的碼頭之類物體……煩……於是諗諗下，不如去搵Chan……不過冇搵到，反而飛左去一堆舊唐樓，見到一個覺得佢似小魚的人在唐樓露台嘆茶……-__-(個感覺好似睇鄭秀文最近拍長恨歌，佢個後生look咁，好典雅……)
之後……最精彩黎啦∼
我覺得周圍都咁無聊，見親海，一諗起龍就會有架啦……(咁樣太造作)，路過遠遠見到一個正在打仗的海邊城市(好高科技，唔似係香港，我都懶理)。再飛，覺得與其咁無聊，不如搵下佛祖傾下偈……跟住唔知點解，飛左去海邊。
跟住我不斷咁諗搵下佛祖，然後個海度就湧左好大既頭(大過我個人)出黎，佢塊面青BB，頭上兩隻角(十足十撒旦)……
我就諗住問佢帶路，不過佢話唔得，唔俾我去……跟住佢就潛返落水……跟住我又唔願走……跟住有個唔知乜水(我當時諗起個名詞係經理人)，佢就同再浮出黎既惡魔頭(今次無角，好光滑)講：「佢(小葵籽)難得黎到，你咪俾佢落去見下。」
個惡魔頭好勉強咁答應，然後開左一條海路，我直飛落去，落到去就係一條樓梯出口，個地方感覺好污糟，好似去左o的「流氓診所」既地方……仲要門口有個位置俾人放填好左既表格。「搞錯呀，仲要貼相……我邊度搵表格同相，我邊有咁多時間」(我同我經理人講。)
佢話放心，我幫你搞掂份表格，無帶相唔緊要……我求其揭下堆表格，我記得有一張相好熟口面，係我識既人，家陣諗唔起。然後又四圍參觀。心諗佛祖一定應診緊……
之後見到有個侏儒咁上下既人拎住個鐵盤(診所)行過，我就即刻追住佢(因為我feel到佢應該係o的神秘高人，佛祖身邊o的馬仔，咁咪想問下佢見佛祖有無捷徑，有咩要注意……)
佢見到我就係咁跑，我係咁追……仲打佢(真暴力……)。經理人見狀就跟住安慰個侏儒，話我無惡意，只係想問下野。跟住個侏儒同我講：「與其問吉，不如問凶。」
跟住，我本來諗住繼續參詳下呢句偈，然後繼續等見佛祖……點知……醒鬼左……
心知都好難再去返果度，唯有記住兩句偈，同大家分享下……
提外話，仲有一次出體，係見到o的好熟朋友，我響入面迫佢睇自己對手，跟住佢睇完之後，個樣即刻彷如大悟，仲話：「點解對手點會咁架？」
我就同佢講：「咁你以後響夢裡面就唔怕俾人控制……」