wy的經驗(050609)
睇呢網站睇左咁耐，有一點係記得好清楚，king
sir話出體係會清楚記得醒左之後自己所做過o既野，咁耐以黎亦都有試過幾次「出體」經驗，但每一次既出體經驗我記得既都唔係好清楚，多數都係出體後幾分鐘先記得清楚，之後做過o的乜，只係東一塊西一塊既片段！
點解會有咁既情況呢？係咪功力未夠？好似今朝早咁，我細佬返學，比佢嘈醒左，之後再訓返，連自己都唔記得左點解會出體，係突然間知道自己企左起身，有種輕飄飄既感覺，於是我知我自己咁出左體，果時係好清楚自己出體，我重諗到呢樣野添：「前幾次出體都唔記得望一望自己既肉身，呢次要望一望先得！」
於是我真係坐言起行，望一望重訓左響梳化既自己，又真係比我見到自己喎，望到自己果時真係一o的都唔驚，因為我知自己係出左體嘛，而且果時我真係望見自己訓梳化，訓梳化有咩奇呢？呢幾日因為要執野，張床好亂，呢個幾星期我都係訓梳化，換言之，我今朝既經驗，清楚咁見到自己訓左響梳化，咁應該唔係發夢啦！跟住我重諗起king
sir話出體之後有瞬間移動o既功能，於是我真係想試下呢個功能，清楚咁有個意識係「我要去到我女朋友果度，我要去到我女朋友果度」，不停咁想，去唔去到就唔知喇，就係呢一刻既記憶開始模糊，醒左之後最清楚記得既係「望自己既肉身」、「想用瞬間移動」呢兩樣野，其他既，醒左之後好模糊，唔記得左喇！
所以我想問問，係咪我功力未夠，唔可以清楚咁記得出體後既每一個過程？