asdfoiewr的經驗(050307)
呢輪我又改變返在半夜出體，朝早硬係覺得好淺度出體，回體又快。尋晚約4點，起床，活動一陣，再訓，我轉左出來，去左一個唔知係乜既室內。攪左一輪都走唔到，於試用瞬移，當時無諗住去邊，只係要離開果個地方。ok，去左第度，好黑，有條長走廊。走廊另一邊遠望係類似酒吧的地方，我行過去睇下啦，參觀下……
發現有好多房，我求其入一間，見到有床一張，二個女人。跟住我又走去另一個，又係一張床，好黑，有幾個女人，如是者入左四五間房，都係女人，每入一間房o的女人就越老……
行行下我感覺到呢度係地底，我飛唔到出街，於是我發力不停向出飛，好似鑽地咁，轉左好耐都未到地面，意識有o的維持唔到，我一路向上鑽，一路叫：「我要清醒，我要清醒」，好在，無回體……
終於飛左出地面，我繼續不停向上飛，飛多一陣，去到一個超白光既環境。o的白光真係好強，好強，好辛苦，我keep住個意識，死都唔回體，隔一陣，又唔覺辛苦，仲有o的好溫暖既感覺，個靈好似比佢溶化左咁，同o的白光一齊，感覺好難形容，總之好正……回體。
再來一次，今次唔係轉，係用陰力，好似普通起床咁起身。一出黎，感覺超真實，出到廳，我都唔敢即刻飛出街，響個廳度試下先。ok，飛得起，真係出左體。於是我飛出去，我又向上飛，想搵返先前既超級強光。換景，突然，我已置身於白光的環境中，但係無先前的咁強，個靈亦無溶為一體，好似有人同我講野，又好似o的記憶能量球咁。當時有少少溝通，但係唔記得左，過一陣，我向下飛，飛出了那些白光，仍然響空中，我回頭向上望，望到一個類似太陽的發光體。它發出的超白光濃罩著一個空間，個空間睇落去好似一舊好大既白雲咁……回體。
再來一次，轉左出黎，行行企企，好快咁又回左體喇。