小魔女的經驗(040921)
由四月中開始，我日日都來這個谷∼
King sir的出體方法，只練過幾次就放棄了，因為唔想第二日冇精神工作(剛畢業，打第一份工，要事事小心)。
雖然從沒有出體成功，但試過幾次在夢中知道自己做夢：
1)第一次，係2000年的事，當時還未知道有「出體」這回事，當我一知道自己在夢境，夢中的背景就立即轉了，突然心想上太空，就去左太空∼見到紫紫紅紅的星雲不斷擴大，好靚，於是我嘗試飛過去，飛飛下就醒左。
以下幾次，係去過king sir網站後的夢境，有心想發清明夢，次次「清醒」的時間都好短暫，我都記得邊個夢先，邊個夢後。總之，自從認識「出體」後，發清明夢的機會多了。
2)我知道自己發緊夢，由得個夢繼續(其實係唔夠清醒改變夢境)，但係我聽到另一o的雜音，係自己把聲(意識流)，斷斷續續的雜亂思想，前後無因果關係……總之，感覺好奇怪，好似有三個自己：一個發緊夢、一個睇緊戲，一個吟吟沉沉講緊野。呢個狀態維持無幾耐，又模糊番，冇左清醒的意識。自此後，我絕對相信一個人訓覺時候，都諗緊野。
3)當知道自己發緊夢，場境就轉，無端端……自己響夢中飛梗，唔知飛緊去邊我嘗試控制自己，反而更失控，越飛越快，而且不斷打圈咁飛，真係製造左龍捲風……
當時快到好驚……一陣就嚇醒左。
4)呢次……有好明顯的夢境切換感覺。清醒前，我咁樣自己同自己講野：
「我發緊夢？」(突然覺得自己俾o的金光包住)
「唔係」(黑番晒)
「咦！」(又光番)
跟住好清醒，清楚感覺到自己著陸，但除左自己全身金光之外，睇唔到其他野，包括自己身體。
開始緊張，好想維持呢種狀態。一著地就跳起，就向上直飛，覺得自己震緊。然後，又黑又光切換左一兩次，又繼續發番之前個夢。訓醒之後，淨係記得清醒果段，唔記得黑左果個普通夢。
我仲有個普通夢……
在夢中突然諗起阿樂(阿樂係咪好感動呢？)。於是眼前就有間寵物店，條街同間鋪似係三十年代建築。我走入去買左隻貓……嘿嘿∼