小葵籽的經驗(041030)
成個星期無次成功，尋晚&今朝都再試……但等極都無體徵兆……數到20反而令我好眼訓……索性側睡訓覺，由8點開始賴床到11點，中間反而有幾次出體感覺。(約3次。)
第一次，一有意識，就feel到自己大概出左8成，連個頭都出左，淨返少少，兩隻手仲係床上游乾水。於是好冷靜咁爬落床。唔知係咪好耐無出體，腳好軟呀……但視覺幾清……我仲見到把風扇已經移左位。
企好之後，繼續腳軟軟，但唔知做乜……今日見到自己有三隻腳……-___-仲feel到其中一隻腳後有舊野係連接住個body……(咁就知自己想唔返肉體都幾難)
由於我唔鍾意跳樓，我決定由門口出街，諗出門口，又腳軟，企左一陣……穿過屋企大門前，搵兩隻手，用指尖先穿過去，覺得好似穿過d棉花糖咁……
出到外面，有d細路跑來跑去，但無人見到我。但其實走廊上的門戶已經同現實唔同。(明明有兩個單位無人，但我見到有人住左。)跟住我望到有電梯……咁我諗，穿過電梯跌落去都係跌落去，比跳樓放心好多。
於是就穿過電梯門，即時潻黑一片，然後就開始覺得有種跌落去感覺。(但無強勁離心力，所以事後有點懷疑)
跌完之後，發現自己騎住副「眼鏡」飛在半空……
點解知道係眼鏡，因為睇到自己個影(究竟出體有無影呢？？我已經唔係第一次出體見到自己個影。)
地點係一個屋村，我無興趣知道地點年代，因為我之前幾次都花左唔少時間做呢樣野。
咁我諗諗下，醒起，做乜唔搵下究竟邊個係我老師……(我意思係踢我下凡去做人的「上師」之類)
我個心諗住「搵老師」，之後，果然有一股引力推動我，將我由半空中，推埋一邊，然後推我上空中，我見到眼前一層層雲向下沉……咁就數……穿左幾多層？？會唔會夠鐘返歸？？
數到大約第七層「天」，跟住好似電梯門打開咁，推左我入去……入面好似開派對咁，人多到爆，有d人係度飲緊野。我都唔知搵邊個。好彩門口有d類似待應生，佢地拎住d燈籠之類，我都未開口，佢已經同我講「何平禮南邊」……
跟住我諗緊南邊係邊……聽到姓何，我突然諗起係咪道家既八仙？我都未開口，佢又答我……唔係，係「啟生」……大概係職級啦……再跟住就混入人堆搵人……一轉身，就見到個老人家……
我「心知」佢就係我老師……咁就埋去問候老人家……
「老師，我家陣進度如何？」
「算係學識基本功啦……」(好串，好好串……)
「…………」
「你屋企個廁所水箱好似俾水務局d人唧左d野入去。」(無端端講呢樣……我R爆頭。)
「師傅，你意思係我返屋企睇下個廁所水箱……」
「…………」(佢個樣繼續頭向天，好串！)
「師傅，你意思係我返屋企睇下個廁所水箱……」
「…………」
佢老人家竟然唔答我……跟住……我仲返左身體入面……即醒……我決定今晚問下亞媽個廁所水箱係咪要整整佢先……(其實屋企個廁所水箱都成日滲水……但據房處既人整過之後都係咁，無得整)
之後兩次出體，都無乜特別。
記憶最深係……再次穿入電梯門，但中途有電梯上黎……
搞到我兩隻手俾D層板穿過左，個人又穿唔過度門，唔湯唔水……所以叫大家唔好係電梯度玩呢……
但究竟我幾時可以係清醒狀態命令自己出體呢……
另外，我到今時今日，出體後睇返自己，都依然係一對「肉手」，一個肉身……