雯信的經驗(050120)
尋晚攤響床好耐都訓唔著，忽然想坐起身，而且耳鳴，yeah∼有得出體。坐起少少身，有種感覺自上次後又黎啦。上半身同頭部郁唔到，但手腳郁倒，我背後有道力好似塊板咁墊著我坐起身。好奇怪既感覺，接觸墊著既身好硬實，吸住咁。
本身個身好輕，但我又感覺兼見到自己蓋左張被。一個身有三種感覺，一路唔郁得但又一路坐起身，趁呢個起得咁慢既時候望下我肉體個樣先！=。=後腦有o的野扯住，道力好勁，轉唔倒頭望。試左好多次都唔得，醒起要靠意志力。試下先，望右，望倒，再右o的都重得，硬係就望唔倒後面！
咩野扯住我呀？伸隻手去揚下後面，隻手一響後面郁黎郁去扯住最厲害果個位就痕痕地。唔通真係有銀帶？嘩！都係唔好攪！個身郁唔倒好冇癮……於是猛踢腳猛掙扎，終於差不多成身郁倒，只淨上半身右邊重有o的硬實感覺。唔夠氣力控制啦，覺得有o的頭暈。即停止動作，停左後好快冇頭暈……
為左知道自己係咪真係出體，再做o的野先，試下開床頭燈，真係拍唔著……都係訓返低，再起身睇下對比下係咪真係出體啦。於是訓低眼光光等自己入返肉體，冇左耳鳴，我今次真係起身，我雙腳響被入面，冇掙扎出黎。而且床尾有一件褸，頭先冇左，燈係冇著，但有o的唔同，原本燈制未按係上凸下凹，頭先轉左下凸上凹……唉呀！我話時話做咩咁傻要自己返物質界呀？最後都已經不知不覺中可以控制自己郁而且感覺上重可以出多陣，我做乜咁傻……
下次一定要等自己坐哂起身，睇下跟住有咩進展\0/