小葵籽的經驗(050210)

  如大家所言,呢排short左,初一初二都照出……

  不過無出體去拜年……

  初一簡單,只係練下向上飛。因為我想飛出呢個地球,試下係上空睇地球……但飛左陣就回體……

  初二(今日)課題:都係飛天。不過,今次學精左,一出左黎就行埋一邊穿下牆先,穿完先去跳……^^今次又有亞媽響窗口邊……但今次無理啦……反正我係溶出去牆外面跳。

  跌到落地面前我先識浮,一飛就衝上天啦,飛呀飛呀,突然,成個天好似一張畫紙,我穿左過去,跟住見到一個灰色既格仔天(果一刻覺得,乜個天咁兒戲。),我唔記得有無再穿過去。但眼前係一個好似市政局o的街市既內部(即係天上面有個街市之類),有條電梯係搭上黎呢個街市,我響街市的中間半空停留,見到其中一個門口有好多人在等候入去,我睇唔清係咩門口,但留意到條電梯上有一個保安,突然,我feel到個保安同我講左句野:「去年有個叫做『井影』的人誤闖入生死事件室後就被禁止再入去。」

  跟住我就醒左。果一刻,我係諗起chan姐。

  其後,我都仲有醒下訓下發下夢,夢中係不斷咁出體。基本上我係繼續練習飛。有舖去左一個city,好靚,好色彩繽紛,o的樓唔高,但全部外牆係用鐵皮造,然後油得好靚。我響個城市遇到一男一女。佢地帶我去一個地方,好似係叫我睇下四周。但突然,個男既帶住另一個人離開,臨走前同我講:「你仲有一個小時睇清楚四周圍,無問題就留響度住。」

  跟住,我諗:「傻架,我出緊體,無端端做乜留響度,我留響度,現實既我咪瓜柴!你都傻既。我仲有大把野要返去做。」

  跟住我望下留低既女人,佢望望我,同我講,佢唔走得住,因為佢同時係我同我媽的守護靈(意思係,就算我留低,佢都要繼續返去睇住我媽,如果我唔想留低,佢都唔會迫我留低)。咁我就諗,傻啦,出體之嘛,隨時都返到去。只要個身體張開眼就返左去啦。個女人無乜特別反應,佢好似係「哦」,咁於是我就叫自己起身。

  醒返。

  之後,我就覺得,呢個係signal叫我暫停一下出體。於是我就訓返……亦無再出。

  其實,諗落當時個男人同我講,「你淨返一小時。」,個心係寒的。

  題外話,我諗我要返出體bb班,呢排完全係唔識飛,除非係跳落街,仲要臨掂地先本能地浮起……-___-更加唔記得點樣可以瞬移呀……搵人教返我呀……