asdfoiewr的經驗(050123)
尋晚三點起身，直接出體失敗。到五點起身，五點三再訓，幻想打桌球。過左一陣，桌球畫面好清楚，出埋波樓既背景，成個人入左去。我知道自己已進入夢境，立即命令幻覺消失，場景即時溶化。一陣離心力，場景又再出現，我知自己應該未出到體，合埋眼再黎一次，今次感覺回到床上。我起身，在房中，因起身時無離心力，及場景非常真實清晰，所以懷疑是否出體中。係天光，見到老婆坐起床度，行出廳，見到兩個女人，一個係老婆，一個唔知係邊個。跟住再行入房，又見到兩個人訓左響床度，我知道自己出緊體。再行出廳，有個落地大玻璃，我行埋去篤隻手指入去，ok，可以穿透(因太真實，所以再confirm)。我飛出去，見到綠草如茵，有低密度房屋，地形似係淺水灣。一路飛，伸雙手出黎睇，無左兩隻手指尾；反轉手背，無左兩隻無名指。睇真o的，原來係縮細左。跟住我試下瞬移啦，我口講話要去我亞媽度，不過無反應。再合埋眼再講，講埋地址，一陣離心力(幾驚返左歸)，Yeah！第一次成功。到左亞媽屋企，見到佢響廁所，坐住輪椅，佢推出廳，入房上床。屋內間格有點不同，我望下個日曆，2004年10月12日。我開頭以為亞媽睇我唔到，點知佢同我講野，佢話：「老豆今晚要開工，唔返黎訓！」
我同佢講左幾句，跟進飛出街，個天好黑一片，隱約見到o的平房，我又失去焦點，一陣離心力，去左o的好大既廟宇上空(好在無醒)，有好大既石級。每級都有不同既圖案，見唔到人，再週圍飛……回體。