alittlefish的經驗(050130)
尋晚訓到到半夜(因為醒左係3:30am)，突然感覺到兩隻腳唔知比o的咩野不停咁拉扯，好似想拉我出去咁，我意識係清醒，心想：「會唔會係鬼扯腳呢？」佢繼續拉扯我對腳，好似真係好想拉我出去，咁我又想：「會唔會係出體訊號呢(因為未試過)？」
於是我放鬆哂全身，個心就說：「好啦，我出啦，你唔駛再拉我了。」成功，我感覺到成個靈魂由雙腳那處比佢拉左出來。
好奇怪，我一出來，果種拉扯感覺馬上消失左，於是我睇下四周，唔係我間房，係一個雜物房，好多櫃，我穿牆行左出去，見到條馬路，有人有車，我馬上自動低飛過馬路，見到有個男人行埋來，佢竟然問我：「請問你死左未架？」我答佢：「仲未？」佢好失望咁對我說：「對唔住，我以為你死左。」跟手行左去。
我無理佢，又低飛左去對面，有個商場的入口，我飛入去睇下，環境又開始暗暗地，我馬上伸出右手睇，隻手好細隻，有些扭曲，跟住我放下手，睇番環境，見到兩條自動電梯，一上一落，有個女仔從上面走落黎，同我講：「你唔好上去，走啦。」
咁我問：「點解？」
佢無答我就走左。跟住我不由自主地向後飛，離開左個商場，跟手回體，醒左係3:30左右啦。