alittlefish的經驗(050116)
五點幾起左一次身去廁所，洗左個臉再訓過。肉身好快又訓著，但意識就好清醒，好似睇住個肉身訓著咁。在無出體訊號之下，我叫自己起身，得，然後又轉出來。跟住穿過牆飛左出去，立即去到一條水渠，個樣好似我屋企附近的水渠。我見到條渠下面有好多水，水上面有好多浮萍。我沿著水渠一路低飛，見到水上面的浮萍越來越多。
這時候，我清醒的意識對自己說：「舉起自己隻手來看（這是我日思夜想兩星期以來第一次在出體時叫到自己舉起隻手）！」立即，我真係舉起隻右手來到眼前，我成功了，但係感覺好痛（唔係痺），我見到自己隻手同肉體果隻唔同，有少少扭曲左，但係我知道是自己隻手，我好開心可以見到佢（唐望教話見到隻手，意識便可以控制景像更清晰），我看完第一次隻手，又看看那條渠。我見到渠水發出一些光波，好像是由那些浮萍發出來的，於是我又舉起隻手來看，又見到自己隻手。我再看看條渠，那些光波越來越燦眼，我頂唔順，一飛飛左上天上面。
我見到幾舊發光的雲，我穿過其中一舊，感覺好輕好舒服。然後我又再看一次我隻手（每次都會好痛），然後再看出去，嘩，見到有個男仔，著住一套黑色衫褲。個男仔勁靚仔，短金髮（感覺係中國人），左手上拿著一條紅絲帶，右手拿著一隻金杯，他將杯裏面o的野倒左落下面，我望下，好似係閃閃下的金粉。我又望下佢，佢對我笑左一笑，我感覺好高興，但係突然間不由自主向下墮去。我叫自己唔駛緊張，慢慢又去到另一地方。
我見到一片草地，好多阿伯。我又回來看自己隻手，然後再看出去，仍然見到好多阿伯。有幾個坐在長椅上，個樣好累，有幾個坐在草地上，旁邊有好多雀籠。跟住我沿路浮過去，見到有韆鞦、滑梯和木馬，上面全部比阿伯佔著。跟住環境變暗，我本來想再看多次自己隻手，但無得看了，我好快已回到肉身。
PS：
1.在出體時叫自己舉起手來看真係可以睇到多o的野架，不過感覺隻手好痛，唔知點解。
2.第一次見到甘靚甘型的男仔，好開心呀！