阿樂方舟的經驗29(040419)
禽晚四點訓，訓到今朝九點，俾我老婆個電話吵醒，傾左半個鐘頭，再訓……
訓果陣已經有d料到，因為個人好「飄」，冇耐，我進入左俾鬼責狀態。
一進入狀況我就發一個「起身」意識，想像自己雙手伸前咁「起床」。
順利離體，我係自己張床起身，好耐冇試過係出體後係屋企了。我兩手伸直咁向前摸，行出廳，一邊命令自己「看清楚，唔要幻覺」。
出左廳，景像同現實一模一樣，見到雪櫃頂有我三隻寶貝係度對住我叫。
我心諗：「佢地係現實係咪對住空氣叫呢！？」冇理佢地，我向門口穿出去。
一穿，出面既環境已經即刻唔同晒，原本係唐樓，一出去變左屋村。
眼前一條長長走廊，有唔少行人穿插。我發現，我既視線有d古怪，因為我可以調校視線，我雙眼可以對焦去任何地方，好似數碼相機咁，有1x，2x，4x，8x，16xzoom，甚至無限距離zoom功能。我當時zoom過去望過勁遠既門牌號碼。
我心諗：「這就是千里眼了。」我當時冇再去研究，好似覺得係本能咁冇去再留意。
我不斷四圍穿牆過壁，入左唔少人屋企，途中我聽到有d聲係度叫我，不過我冇理。
穿呀穿，我不自覺咁穿左出去空中，望一望下面，有成五六十層樓咁高。
我係空中行返入去樓內，之後見到有隻白色貓跟住我，原來係佢講野，仲講中文，不過我冇心聽佢講乜。
我命令佢消失，之後佢穿門走左。之後我feel到裝修佬又要玩電鑽，真係，轟轟轟~~~~回體。