阿樂方舟的經驗27
昨天凌晨四時半開始至七時，睇左三個鐘頭賽斯書。之後上床訓覺……
睡前心中想著：「多謝賽斯，珍及羅，如果唔係你地出書，我可能冇機會認識到自己，今晚我要出體，謝謝。」
大家有冇發覺，我呢期出體之前都會感謝高靈們？我試過四次，發覺有三次能夠之後成功出體，暫時成功率達75%~~~其中一次沒反應。所以，真係唔到我唔信……高靈們永遠在左近。
訓覺，發夢，依希記得我大佬話唔想做差佬，話成日俾人屈，不過到最後佢都會繼續做落去……@_@"
當我就快醒既時候，我感覺到我雙眼不斷咁眨眼，但我係合埋眼既。眨左大約十秒，我眼前由白光轉為黑暗。
進入左俾鬼責狀態，yeah~~~久違了的感覺，我即刻起身，好順利，永冇click住~~~熟習晒囉~~~
望一望四周，呢度係我阿爺屋企，位於土瓜灣樂民新村A座。
現實中我阿爺已經死左差唔多十幾年，上址現在係我阿叔一家人住。
不過唔知點解，四周既影像好似加左紅鏡咁，度度都紅紅地，好似神枱果兩枝紅燈咁款。
屋內冇人，冇靈，我穿出去門口，同現實一樣，門口一出已經係電梯口，可以望向樓下，望向高山劇場，十幾層高。
電梯對面係樓梯，有個阿婆好似買完餸咁行上黎，唔知係佢見唔到我，定係見到我都冇反應，行左去。
電梯口好大風，完全感覺到，好似颱風咁，吹到我郁下郁下，外面又橫風橫雨……
我本來諗住飛出去，但見到又風又雨，心諗：「大佬，咁既樣點飛呀，可唔可以陽光普照呢？唔該。」
話口未完，我睇住個天現左一條陽光，開始驅散d烏雲同風雨，漸漸變番風和日麗。
我心諗：「唔係呀？咁都得？」於是我向後退，準備一野跳落街。
突然間，我又諗：「咪住，一陣唔係出竅咪pk？死硬播。」於是我停係度，感受一下個身係靈體定肉體，確定左係靈體，feel唔到肉體之後，我就再次準備「飛街」……一……二……三……
轟轟轟……
我聽到轟轟聲，pk，隔離屋又玩電鑽，我慘被吸入黑暗，回體去也……醒左……@_@"(你老xyz@#^(^#)