阿樂方舟的經驗26
今朝六點鐘打完女神轉生，訓覺，聽日要返早，心諗橫掂都唔夠訓，今晚要出體。
一邊訓一邊唸：「賽斯保祐，門羅保祐，餃子保祐……我要出體。」
不過可能我太興奮，攪到我眼光光飲左一個鐘頭豬肉湯……@_@"七點先訓著。
朝早十點，我女友嘈醒左我，我起左一起，倒頭又訓過……zzzzz……
一訓，停一停，我就一野跌左落黑暗隊道……隔左一陣，因為我係側睡，所以見到左手。但係肉身係合埋眼既，我用意識去郁動左手，影像見到左手係度郁。(當然唔係肉身隻手啦~~~)
呢一刻我知道出左體，但係我好「累」，我完全冇力去嘗試起身，好似吸實左咁唔郁得。跟住，又停一停，之後急降，又扯左入黑暗隊道…。。在隊道中，我好似俾野click實左。
突然有一把聲音向我講：「出體要用好多血，你依家唔夠血，不過仲可以繼續。」
我緊係繼續啦，冇奶油過隧道中途放棄嘛……於是我好努力用番我既個人動作－－倒頭「中」，「中」番落去個隧道向下降。停左之後，我仲未見到野，仲係一片黑暗，果把聲又同我講野：「你試下畫幅畫出黎。」
無啦啦唔知點解我感覺到我拎住枝西洋畫筆，我開始照佢咁講，在虛空之中揮筆。過左冇耐，影像出現，我只能有限度咁畫左一小部份，亦都只能看見這小部份影像。
之後，影像好似掃一掃咁，睇晒全部影像，我全部視線見到一幅彩色既畫。
幅畫好難用文字形容，只能略略咁講：畫中間有一個導演拎住部投影機，面向左方。右半部份畫左一d道具場境，類似片場，透過中間個導演部投影機，射出畫既左半部份係一片美麗既大自然境像。總之個概念係－－「假像」透過人而成為「實境」。
(大家不妨用呢個感覺去畫幅畫，就知我幾咁難去用文字黎形容…。。@_@")
睇完畫，把聲又出現，係一把男人聲，俾我既感覺係佢講野好老定，好有深度，仲有d幽默感。
佢用輕鬆又帶點穩重既口吻同我講：「將幅畫掛係你舖頭，會好好睇。」(呢樣佢都知~~勁！！)
我：「咁我咪要改名叫出體網吧^_^？」
佢：「d警察會上黎捉你^_^。」
突然，我感覺到我有d唔妥，好似嘔血咁既feel，醒左……喉嚨勁乾，乾到咳左幾聲。
p.s.雖然好主觀，但我覺得佢係賽斯，謝謝你。