阿樂方舟的經驗25
禽朝早六時訓覺之前，我對住「栗子」(貓)講：」保祐我，我今晚要出體。」
訓覺，發夢，我同一個識左十幾年既朋友係度搬貨，佢問我對批貨有咩攪作，我突然間覺醒，知道自己發緊夢，我答佢：「唔駛攪，因為你發緊夢！！」佢有d疑惑，我推開佢講：「唔信我試俾你睇，借過先~~~」我將箱貨一野掉埋一邊，推開我朋友，叫佢讓開個地面。例牌動作，我一野插水式向住地面穿落去………
今次我特別留意身體狀況，首先，好強勁既離心力出現，我個頭落地先咁樣墮落黑暗隧道。
面部仲感覺到有好強大既風阻，排牙好震，後頸位好似有d野泌出黎咁……呼……停左，影像浮現，我坐緊一架冇路軌既過山車，架車係半空中，下面係大海，海中有好多魚……
嘩~~~架車突然間衡落去個海度~~~嘩~~~呀~~~入左海中，成堆滑o都o都既魚湧埋黎，有d嘔心……
在海中衡左一陣，又衡番上半空……準備……嘩~~~又衡番落過海度……好驚呀~~~大佬……嘩……
如此類推衡落海又衡上天空幾次……我成個人差唔多暈暈地……架車停左係空中……嘔……
我見堆魚咁嘔心，我命令佢地消失，攪掂，成堆魚化成光點消散。天色變黑，我命令有陽光，掂左！！
突然間鏡頭一轉……我企左係一條街度。望望四周，個感覺有d似中環，上環，西環……
又有d似民初時代既香港……我望一望個路牌，寫住[梳利亞道]。
我留意到地面上有一灘血跡，望一望前面，有架黑色私家車，旁邊有一個人(靈！？)訓左係度。
我見到有一堆人好嘈雜，於是過去八卦，見到有個警察。
我問佢：「發生咩事？」
警察：「你舖頭對面間魚旦粉舖頭個老闆撞車死左！！」
我話：「o下？？」
警察：「你睇下！！」佢俾左份報紙我睇，上面有張相，相入面個人好熟口面……。
我再望望其他路人，其中有兩個人抱住兩隻兔仔，隻兔仔d毛色好攪笑，好似帶住頂帽咁，寧寧舍舍個頭d毛色唔同色，個身就白色……
跟住我就醒左，醒左後我喉嚨不自覺吞左幾次口水~~~又係口乾……跟住我抱起栗子對住佢講左句多謝。
醒時朝早十時半。
P.S.我到依家都未諗番起相入面既人係邊個，但對我黎講好熟口面。
P.S.現實之中我舖頭對面係冇魚旦粉舖，後面就有。@_@"