阿樂方舟的經驗 17

www.out-of-body-guide.com

  前言:今朝勁眼訓,但係俾貓貓嘈醒幾次,起身飲水再訓,心諗唔出體至奇,真係出……

  發夢,自己係天堂2既主角,四圍斬怪,我大佬同我阿嫂係隊友……

  突然間,夢中既我企左係度,好清醒,知道自己發緊夢,唔再打怪,行埋去我大佬度同佢講:「喂,咪打啦,你發緊夢呀!!」我大佬突然間又醒覺左,掉低把刀講:「係喎,真係發緊夢喎!!」

  我再走埋去阿嫂度同佢講:「喂,你依家發緊夢,停手!!」阿嫂好迷惘:「??????」

  我再講:「咦!!你個樣後生左咁多既?」阿嫂:「哈哈哈……係咩?」(即刻了解自己發緊夢)

  我同佢兩個再講多次:「你地依家發緊夢!!」

  我大佬拎起包萬保路香煙,佢有D唔信,我同佢講:「唔信你試下命令包煙消失!!」

  我大佬望住包煙照做,突然間包煙既影像閃左一閃,佢終於信,之後佢兩個坐左係度……

  同佢地解釋真係浪費時間,我心諗去第二度,離開呢個夢境。意識一出,我墮落黑暗隧道,今次我冇諗住去邊一度,只由得自己墮。

  墮左好耐,真係好耐,第一次覺得條隧道好長。到了∼影像浮現,一片黑暗既地方。

  沒有陽光,只有黑暗的山頭,黑暗的森林,仲有零星的火光。

  我開始飛行,但唔知點解,我係緊緊咁攬住一個漢堡包飛的。之後越飛越見到多人,全部都係係度打打殺殺,我飛低D睇清楚,見到有人。一個中世紀戰士拎住把刀斬緊怪獸,隻怪獸高過佢兩個身位。

  把刀近到差唔多掂到我,我即刻飛番高,好險,唔知會唔會俾佢斬中,而且有D驚自己會跌落去,所以我係咁攬實個漢堡包。飛飛下,有個女人走過黎講:「你地快d走啦!」

  我下意識都想走,於是回頭飛走……咦!!我隻手feel到有野責住,醒左,貓貓責住我隻左手……@_@"

  p.s.醒左之後,我回想返個過程,諗到有D唔對路。果個女人話「你地」,係咪即係仲有人同我一齊飛?咁果個人係邊度?唔通係果個漢堡包?奇怪!!