阿樂方舟的經驗15
發左一d好不安既夢,之後我突然間醒覺左,好清醒,意識一出,即刻好有離心力咁墮落黑暗隧道……
回體中,我冇郁,由得佢自由發展,返到肉體,feel到自己有種升起感覺,眼前由黑暗變左有影像。(全程自動)
我望望四周,好大隻字影入眼廉-小西灣,X泉X……現實都未去過既地方,淨係知係柴灣再入D。右手邊有條斜坡,左手邊係一幢屋苑既樓。我發上去幢樓最頂,一層一層望下屋入面有乜。
當我望到其中一間有四個女仔既屋,其中一個女仔大叫「嘩~~~~」,我俾佢嚇親,跌番落去最低層。
我心諗:「點解佢見到我?」當意識一出,我發現我既左手拎住兩個聖鬥士星矢透明膠袋,我下意識知道笠住佢,D人就見我唔到。我笠一個係頭,另一個掉左。
再去偷望人家,掂,真係冇人睇到我。直至我見到一個神檯,上面有尊觀音像,我停係度思考。
心諗:「原來D佛像只係一種形式崇拜,只係一件製成品,根本乜都冇。」
想得出神之際,有個貌似看更阿伯既人飛埋黎叫我:「走開~~~走開……」
我慌忙道歉:「唔好意思~~~唔好意思~~~我走架啦……(指偷睇人一事)」
我沿住斜坡飛番落去,由於係日頭,D野睇得好清楚,我見到大約幾百人行緊條斜坡上黎。又見到有五個人飛緊上黎,佢地……竟然都係頭笠星矢膠袋。我感覺出佢地都係出體者。(識別訊號?)
我飛去帶頭果位人兄度,正想大叫:「喂,你地又係出體呀?」但佢一早手指指,做出:「殊~~~」既動作。
我諗番起個看更阿伯,我了解,唔好咁揚。我同佢一齊笑,大家心照不宣。^_^我地各自行動。突然有個人指住五位出體者講:「加多你地幾個……」果個人手拎住本簿,上面寫滿人名。
我飛埋去睇,本簿見到我個真名「XX樂」,同另外五個出體者寫埋一組,用另一隻色既筆圈住。其他仲有好多人名,但同我地隻色唔同。(入境手續?)
我望望四周,其中有一個小朋友特別吸引我,因為佢寧寧舍舍同行斜坡班人唔同,著住幼稚園校服,佢行另一個方向。我飛埋去佢身邊陪佢行。我問佢……
我:「你係咪死左?」
佢:「係呀!」
我:「咁你點死架?」
佢:「我用枝針吉自己隻手指!」
我:「咁就死左?」
佢:「係呀~~~」
我:「車,唔好話你自己想死~~~」
佢:「"hehe~~~係呀!你又知既?」
我:「冇一樣野可以令一個唔想死既靈魂死掉!」
佢:「係呀~~~我爸爸都係咁講!」
行左一陣,佢阿媽迎面而來,好後生既阿媽,拎住個書包。佢話要行快D,如果唔係遲到。
佢:「你識唔識飛?」
我:「識!」
我右手拖住個小朋友,小朋友右手拖住佢阿媽。(此時在幢樓既高層。)
我一聲令下:「跳!」三個人(靈)就係廿幾樓跳左落街,一陣離心力出現。我心諗向上升,向前飛。我話:「嘩~~唔駛咁快呀?」原來佢阿媽學緊點飛……@_@
我再講:「以適中速度飛行……」之後我地三個大笑~~~^_^
飛行途中,我鳥瞰下面睇到既景像,有大快活,大家樂,有好多車,好多人。我地一邊飛一邊大笑,因為實在太爽,連果種速度感都feel到,好開心。
天空中更出現一架玩具火車係度飛……(呢架野一定係佢投射出黎。)到了,我地降落係一條馬路中間,迎面而黎一架巴士,我自然反應推開佢。佢有點疑惑,我同佢講:「唔好意思,慣左~~~我以為你有肉體~~~」(我忘記左佢仲有肉體會俾車撞)
佢問:「你有?」我話:「有,因為我未死,我出緊體!」
佢又好疑惑咁問:「出體?咁可唔可以上身?」我知佢講乜,正想答佢之際,我醒左……
p.s.訓醒之後,隻右手仲有拖住佢既感覺,仲好開心,之後,我諗左好多野……