阿樂方舟的經驗05

www.out-of-body-guide.com

  話說今朝訓到十二點,俾個電話嘈醒左,隔左半個鐘左右再訓過……突然間,我係夢中張床度醒左,我意識好清醒,好清楚呢度唔係現實世界。我望望四周,間屋好似我現實既老家,不過d擺設原全兩回事,唯一令我有老家feel既,係我見到我老豆張相。

  我起身,例牌動作,雙手合十,心中不斷咁唸:「我唔要幻相,我要實相,我要清清楚楚……」見到眼前影像閃左一閃,回復正常,好似冇乜改變。我行去眼前的神檯度,見到有塊鏡,我心諗,等我又鴿下自己乜樣先……唔望由自可,一望好驚訝……鏡入面既自己,唔係好識形容,唔係實實在在一個肉體咁,而係類似「水銀液體」咁,形態不斷咁轉變,一秒前係肉體樣子40%相似度,一秒後又變番一「劈」水銀咁反晒光咁……幻下幻下,但我仲feel到果個真係我,因為有「我的感覺」。

  之後我知道時間緊迫,拿拿聲出發,唔再照鏡。我穿牆飛出街外,大約係二三十樓既空中飛行。周圍既景色係一個夜都市,望見地面有D機械人係度行,唔知係步操定巡邏,因為行得好鬼齊整。

  我一路飛一路諗有乜好做,諗起你地話去海洋公園等,於是我口中不斷唸:「海洋公園,海洋公園……」

  我feel到自己越飛越快,好似科幻片咁進入空間跳躍,眼前進入黑暗隧道……(預左會有隧道...^_^)到啦,眼前出現影像,feel到呢度好熱鬧好嘈雜。做多次例牌動作:「我唔要幻相……」

  見到一個幾層高既樓梯係左邊,中間有個泳池。好多人係度游水,唔只人,竟然見到獅子老虎都一齊係度玩水……(我前幾次出體去到好靚沙灘,都見過老虎游水,不過冇講出黎,因為我以為係幻覺)。我命令自己上升,想升高D睇擴D個view,升呀升,升到空中鳥瞰,我興奮到不禁「嘩」左一聲出黎,眼前所見,中間一個大池,四周有好多細池,人山人海,插針都插唔入,d人多到好似螞蟻咁。氣氛好熱鬧,個感覺好warm,好繁華。公園外圍好多高樓大廈,燈火通明,靚過香港夜景。

  我唔識形容,如果大家有玩FFX,主角打水球果個不夜城,同呢個可以媲美。我當時冇懷疑呢個海洋公園,因為我feel到佢有「海洋公園feel」,不過佢係水上樂園。仲有個証據,因為我離遠見到大廈群之中,見到「珍寶」海鮮坊,但係佢唔係海上,係陸地上。

  我繼續係天空度飛,欣賞呢個咁靚既異界水上樂園。突然間我想搵我死去既貓仔,於是我口中係咁唸佢個名:「細咪,細咪,細咪……」不過唸左好耐都唔見佢……

  夠鐘返現實,因為我feel到我口乾,我知道我要返去……醒左,真係好鬼口乾……