比利仔的經驗(040522part2)

www.out-of-body-guide.com

  某年七月某日(黃昏)

  可能唔係發夢

  七月份放暑假時既一個黃昏,我果日同o的同學響維多利亞公園踢左成日波,由下午1點踢到6點左右,返到屋企勁累,見未有耐開飯,我就攤左響廳張沙發上面zzz,我當時既姿勢係訓直,身体同面部都係向著天花板。其實當時諗:「咁累,唔知會唔會又『唔郁得』呢?」咁我當然冇因為咁而唔zzz啦,因為都習慣晒,唔會好驚又「唔郁得」。(我想講明,我唔係每次好累去訓覺都會出現「唔郁得」既情況,只係有時係咁。)

  攤左響沙發冇幾耐,真係比我估中,果樣野又發生。當我訓到放鬆晒果時,只係感覺到頭頂同後腦既重量,雙手、雙腳同身体重量既感覺好微弱,接近感覺唔到,冇哂成個人重量既感覺,左耳邊開始聽到有好嘈既聲音,又係聽唔出係講咩語言,唔明講乜野,只係覺得果把聲距離耳邊一兩呎左右。平時響呢個情況之下,知道「唔郁得」時我會掙扎一輪,跟著就會郁得返,次次都唔能夠確肯自己係咪發夢。但今次唔同,今次係我第一次諗倒點搵証據去証明好大可能性我「唔郁得」時並唔係發緊夢!

  因為當我唔郁得果陣同掙扎緊果時後我見倒我個阿媽行過沙發,仲哄一哄個頭埋黎望左我一下,當時我都有嘗試去叫我個阿媽,但當然好似以往唔郁得時一樣叫唔出聲。我個阿媽行過左張沙發之後,我再掙扎左大約十幾秒就郁得返。

  到左第二日,我係度諗如果我當時可以叫出聲,佢整郁返我(或者叫做整醒返我,如果我係發緊夢既話……),咁即係我當時唔係訓著左,唔郁得果陣並唔係發緊夢!我心諗真係可惜,錯失左一次可以証明「唔郁得」果陣係咪發緊夢既機會。因為我以往發生唔郁得事件時都係響夜晚響自己間房,好難得咁o岩我唔郁得時有他人響我身邊行過。

  果日我成日訓著係沙發唔郁時既情況……到左夜晚果時我突然間郁倒,點解我唔去問下我個阿媽響我訓響沙發果時候佢有冇行過張沙發同哄一哄個頭埋黎望我?!如果佢話有,咁即係話我當時雖然唔郁得,但我仍然睇倒我個阿媽行過同哄一哄個頭埋黎,咁即係我並冇訓著到,我並唔係發緊夢!於是我急急走入我個阿媽間房問佢(當然我冇話佢知唔郁得既事)……

  我個阿媽話我知,琴晚又要煮飯又要洗衫,騰來騰去,實有行過張沙發啦,但係有冇哄一哄個頭埋黎望我就唔記得啦,佢話行過望下我都唔出奇喎。雖然我個阿媽話有行過張沙發但佢肯定唔倒有冇哄一哄個頭埋黎望我,咁証明唔倒我當時見倒我個阿媽行過同哄一哄個頭埋黎既景象係真有其事,即係亦証明唔倒我當時係清醒。我既疑問仍然末能解開。

  下次我會post:終於肯定唔係發夢