比利仔的經驗(040522part1)
終於寫完我最最初的一次經歷(其實最難係打中文字果時@-@)， 可能冇乜特別， anyway，大家分享下， 謝謝。
某年五月三十日(夜)
第一次唔郁得，唔知點解釋
因為連續幾晚溫書溫到3點幾4點，果晚到2點幾已經頂唔順，雙眼真係累到極點，勁打喊路，響我間房入面書檯側邊就係睡床，咁既擺放真係一流，每次做功課做到勁累都會側側身順勢由書檯張椅碌落張床跟著大字形zzz，果晚雖然個人勁累但個腦仍然未累，我好多時都係咁，肉體勁累恰埋眼休息時個腦仍然不自控咁勁諗野，果晚一樣係咁雙眼真係累到用牙籤都撐唔起，於是順勢由書檯張椅碌落張床跟著大字形zzz。恰埋眼……果晚就經歷左我第一次「唔郁得」（唔知係咪俗稱「被鬼壓」）既感覺。
果時既過程係咁……好累咁響床度恰埋眼之後，雙眼同膊頭都好累，但我個腦仍然不停咁諗緊野，可能太累既關係，成個人放鬆哂，果一刻只係感覺到頭頂同後腦既重量，雙手、雙腳同身体重量既感覺好微弱，接近感覺唔到。其後有大約幾秒時間覺得連頭既重量既感覺都冇埋，跟著左耳邊開始聽到有好嘈既聲音，我都幾肯定係一把女聲，不過聽唔出係講咩語言，更加聽唔明佢講乜野，只係覺得果把女聲就在耳邊一兩呎距離左右，聲音有小小剌耳，當時我好驚，想即刻起身離開張床，但發覺我既手腳完全唔郁得，果時我仲更加驚，我再用盡力去郁o的手腳，但係根本郁唔倒，o的手腳好似比野整實哂，之後我想大聲叫我個阿媽，當時我個口可以郁但就完全出唔倒聲，果時我真係驚得好利害，係驚到想喊，我響張床繼續用盡力掙扎，大約掙扎左廿幾三十秒之後我終於可以郁得返，果把好嘈既女聲亦都消失左，但我當時仍然好驚，唔知咁係咪人地講既「被鬼壓」。
果次之後我真係滿肚疑惑，果把女聲究竟講乜野？點解我o的手腳會唔郁得？點解我當時會講唔倒野既哩？後來我覺得在末解開手腳唔郁得、失聲同聽倒怪聲呢幾個疑惑之前，我想搞清楚果晚發生既事究竟係乜？係四肢抽筋？係發夢？係「被鬼壓」？定係我有病出現幻覺？
如果係累過頭四肢抽筋，無理由o的筋冇抽著痛，又冇理由會連聲都失埋講唔倒野。咁我會唔會係發夢呢？但發夢o既畫面應該比較糢糊同斷斷續續，好少感覺咁真實，發夢醒返時既感覺通常係醒左時對眼仍然恰埋緊，之後開返對眼跟著好清楚知道剛剛發左個夢，但係晚既情況係要掙扎一輪之後先醒(先郁得返)，醒果時係突然間開哂眼同埋唔清楚自己係咪發夢，同發夢既情況好唔相似。排除左抽筋同發夢既解釋，我自己諗剩底既就只有「被鬼壓」同「幻覺」既解釋！？
我好驚再次發生唔郁得既情況，但我越驚就越想知道究竟係咪「被鬼壓」。
自從果次既經歷之後，同樣既情況耐不耐就會再發生響我身上，多到我都數唔倒有幾多次，不過多數係發生響夜晚。到而家，我已經冇再驚「呢樣野」響我身上發生。（我用「呢樣野」而唔用「被鬼壓」黎形容呢種「唔郁得」既情況係因為我唔能夠肯定「唔郁得」既情況係同靈體有關，眾生平等，在未確實到情況之下就將件事歸咎於靈體，似乎有o的唔公平。）
後記：響第一次發生「唔郁得」事件之後兩個月左右，我做左一個十分詳細既身體檢查。檢查報告顯示，我肯定沒有任何可能出現幻覺既病。
如果文字太多， 唔好意思， 下次我放係我個網頁不如。謝。