天劍的經驗 02
話說係星期四晚，黃昏，曾一道出現清明夢，但眼前所見一黑，已經期待好一段日子的感覺重現，於是我嘗試離開，我感覺到有強大的耳鳴。再過一陣，我清楚咁感覺到我浮起左，好肯定係「浮」起左。跟住有一輪聲音，我好快咁醒左，果D聲音，原來就係我家人煮飯d聲。
昨晚，我又再次出體，今次係完全出左體了，雖然個意識係好薄弱，但係好似我以前都試過，以前我都係度post過。我依然係在我床上出體，我今次因為意識上比以前出去的決心大多了，所以我諗住去穿過個牆，無論我點用力，但係我都係穿唔到過去。我放棄左，好似隨住我放棄既意識一出，眼前就黑了，跟住我試飛，我好清醒，亦好清楚咁記得我打左個跟斗，個感覺係無重，好似係泳池打跟斗一樣，唔知幾時開始就無左知覺，所以我都無穿過到門。
同一晚，係訓覺中途，我就已經有強烈既再出體慾望，或者係我知道今晚就係一個好時機。唔知訓左幾耐，我發左個夢，夢入面我去左「自己屋企」，但係果度同我屋企係唔同既，果度我從來都未去過，不過間隔係點，似都瀝瀝在目。但係意識話比我知果到係我屋企，發左一陣，唔記得有咩事發過我慢慢意識醒來，我知道我自己係發緊夢，我控制我自己……
意識一出，我就知道我「完全清醒」了！！！果一刻o既感覺係好特別，我會問自己到底係出體，定係意識係「夢」既空間入面。我又好清楚咁記得我仲講左好多野，係呢一個「空間」入面，我見到一個我已故多年的親人。佢好遠咁睇住我，但我冇嘗試同佢溝通，因為意識已經話左比我知，我地無法溝通。我同時亦都見到我阿媽同我阿哥(但係佢地都無話見到我，定係見到唔記得呢？唔係個個都記得自己既夢)，我係呢一個空間逗留左好耐，我當時冇手表，但亦都有時間觀念。同時我亦都好驚我意識講野，肉體個口都會講，所以我都怕嚇親家人，免得人地以為我傻戀左。
大家留意，我一路都係有自己既意識，係呢個空間度，我問左一D好特別既問題，我問佢地係咪我家人，答案肯定。另一條問題係重點所在，我問，咁而家係咩時間，阿媽話係二零零三年七月九日，一個對我毫不重要的日子。我唔知點解，但係我上年呢個日子絕對唔係呢間屋入面，會唔會係係另一個時間空間入面都會有你同我進行中，我卻找尋不到我自己？我同空間入面既家人解釋講，我應該唔屬於呢度，阿媽話，咁你快D返去啦，跟住我開門，就無左意識了。
發夢同意識係兩回事，我每晚最小都發一個夢，昨晚亦發了個春夢，我咁講只係想好清楚咁話比大家聽，我分得開。
另外，我係度諗，如果我真係可以突破到時間的話我會去未來看一看六合彩號碼。事實上我的靈界溝通能力的確比一般人強，係中六既時侯，約四五年前，我曾經準確咁收到兩場賽馬結果。到今時今日我都記得一隻叫先知$80，一隻叫活感$30，當時既同學都可以做證，但我是無睇排位的，但自此以後，我再無收過這類訊息了，或是我先人當時過世不久，不得知了……
到度我能唔能夠再一次衝破時空，有待日後分解了。