Leo Chu的經驗(040426)
我有四，五次左右我個人認為是出體的經驗，全都是在我認識oobe前發生的。
在發生第一次之後，因為我冇oobe的概念，我沿夢的方向找答案，但都唔可以解釋到我既情況，直到我接觸到oobe，我就覺得「係咁樣喇！」。
現在我就分享果一次既經歷。
這是在兩年多之前既夏天，當時我20歲仲係在香港(我現在在澳洲)。我住響采頤花園(即大墈村對面)。當日係星期六，我放工返到屋企，食左o的野，冇街去，有o的眼訓，下午三四點左右，去左訓。雖然巴士聲好嘈，但我好快訓著，我諗大約係四點左右，我發左個惡夢，我驚醒左。我睜大眼，望住天花板，我當時好清醒，聽覺都冇問題，巴士聲好清楚，但我郁唔到，叫又叫唔出(比鬼壓狀態)。
我很急躁，我心裡起左一個意圖(intention)我要坐起身。我猛力一起，我感到前頭頂「赤」左一下，之後後腦「戚一戚」。之後我「見」到既，係我張書桌，但果一刻個感覺，同平日完全唔同。我感覺唔到頭身手腳，我有種好輕，而又好實在既感覺，好有力量，又好自在。
我「見」到既都清晰異常，我「聽」到好多聲音，有汽車聲，有耳語一般既人聲仲有好多物件碰撞聲。但每一個聲音，我都「明白」及「知道」是什麼聲音，並且冇一種嘈既感覺。
我好茫然，我當定神後，我「想」回頭一望，在「想」(意圖的一刻)既時間，我「見」到自己一碌木咁訓左係度。
呢個係關鍵，係我見到自己既時間，我知道自己唔係平日咁活動，而我對上一件做緊既事係訓，所以我當時認為，呢個係夢，但我好清晰。
我連忙過去窗邊，想望出去，當我打算依在玻璃窗上時，我已經在窗外面！我已經離開左我間房……
(由扎起左到呢個時候，大概過左一兩分鐘)
由我穿過玻璃窗離開房間後第一個景象係由我六樓既屋企向下「望」，我見到垃圾車，花叢同馬路。但我感受，明白及知道到每一樣野，每一件垃圾係乜，佢地既由來，植物既呼吸，我感受到果種追求日光既渴望，吸水既暢快，生長既壓迫。
我「想」抬頭的時候，我「見」到的已是我前方的景觀。正面兩條去大耆山的天橋，天橋後面是志蓮靜院，再後面是一群大廈。左面是荷利活廣場。景觀好清澈，我「見」到的，都有一種「明白」和「知道」的感覺。很大的灰塵，但好清澈，每一點灰塵都好獨立，每一個引擎既活動，司機既感受，行人既情緒，我都「明白」和「知道」。
志蓮靜院向上發出一種光晃，我只可以形容係一種我覺得係橙色既顏色，我唔實質形容到呢個顏色。我依然「聽」到好多聲音，有汽車聲，有耳語一般既人聲仲有好多物件碰撞聲。當我的注意力在荷利活廣場一邊時，我感受到每一個個體既感受，但冇一種好複雜既感覺。
特別令我的深刻既有比人鬧完既27歲女售貨員，行得好唔自在好想快o的返屋企既大肚婆(對佢個肚既感覺好古怪，我唔知點形容，大概可以話同其他個體不同啦。)，扭計要買玩具(一種cardgame既野)的小三學生，同女朋友嘈左交既pizzahut店員，等等。
星河明居上有好多感到好悶納，無聊，冇安全感既人。
(簡略一o的無關痛癢既事啦，呢個時候一大概已經係過左5分鐘)
我覺得好興奮，唔同既感受不斷而大量咁湧入，我有種和「真相」同在既感覺。大量感受當中，我比其中一個吸引左，因為佢好強烈。當我有個「意圖」「想」去睇下時，我移動了。
唔係拉力，亦都唔係推力，但我移動得好快，沿龍翔道後跨過一小山見到城門收費站再上去到一個小村，我「知道」呢度叫川龍。
我想講一講呢種時間既感覺，我移動得好快，但我途中依然「明白知道」每一個個體既感受。可能實時大概過左一兩秒，但我有好漫長既感覺，我有好充分既「時間」去「明白知道」每一個感受及個體。
大概只可以形容係「好快，但我當時存在係呢個速度裡面」。
我到達時，冇漸漸既減速，情況係「到」咁就「停」，冇離心力，個感覺好自然。
我在一個坐輪椅既四十二歲男人左斜後方，佢右面有一個長頭髮，穿長裙，二十七歲女人。地方係一座兩層高西班牙式的天台。
個男人佢喊緊，我「知道明白」佢係三年多前交通意外而下半身郁唔到，佢唔可以自己去洗手間，佢覺得自己好麻煩，好累事，佢好強烈地悲憤，無奈，痛苦，不安同激動。
個女既，我「知道明白」佢係男既親戚，屬表的關係，佢覺得好唔自在，無奈，無助，佢想離開，我感覺到佢左手握實，兩腳欲步又止，背脊滲汗，牙關緊合，眼不正視那男人。(情況維持了一兩分)
男的開聲，佢好喊到講唔出聲，只有口形，我「知道明白」佢意思係「呢段日子麻煩晒妳。」
女的報以勉強的微笑，佢有討厭，排斥，抗拒之類既感受。(這大概是第八九分鐘)
男的感受我強烈地「知道明白」，我覺得好難受。
我唔想再係呢度，我想返屋企。
「想」既一剎，我覺得有種離心力好重，「見」到既物件扭曲，之後一黑，一光，我在我葵盛的舊家門前。
我依然感覺到那個男的，距離好似冇減低了感覺。我知道裡面是空的，所以冇入去，我「想」「看」右面便看到了。是長長的走廊，有三十三戶，有的冇人，有剛放學既中學生，有老人，有主婦等等。
有o的門口有地主的，一o的地主有光晃，一o的冇，我可以形容係暗黃色的。
係走廊上有五個正在遊離既個體。我同佢地有一段距離，我唔覺得佢地係人，我完全不「明白知道」佢地係咩。佢地係一種嚴肅，有力量，清爽，端莊既個體。
我感覺唔到佢地既感受，但佢地比我有一種不歡迎，討厭同漠視我既態度。
我「想」沿走廊到另一端，我就動了。我動的同時，他們面對著我，我未走近佢地時，有一種好大既拉力，我有被強行抽起既感覺，一黑，一光，我望住天花板，個腦好實，呼吸好快，心都跳得好快。我慢慢坐起身，見到妳伸頭入黎話「做乜訓都成身大汗又唔開冷氣，你食唔食野呀？……」
我已經醒了。
我訓左一小時左右，oobe我諗十分鐘左右。
我所講，我提及既「見」，「睇」，「聽」，「感覺」同「知道明白」其實都係同一樣野。(我唔係講緊一o的好玄或者抽象既野，我係指真係同一樣野)
當時我冇日常的視覺，但我「知道明白」每個物件既形狀，結構，顏色。當時我冇日常的聽覺，但我「知道明白」每個震動磨擦(聲音)及佢既來源。
由呢次之後，我搵好多同夢有關既資料，但佢地都冇滿足到我。直到近來接觸「出體」呢樣野，我先覺得，我得到左一個非常之接近既解釋喇。